पोखराको प्रतिभा एजुकेशन फाउन्डेसनले संचालन गर्न गईरहेको एभरग्रीन एकेडेमी नयाँ शैक्षिक सत्र २०८२ देखि संचालनमा आउने भएको छ ।
पोखरा–३ तेर्सापट्टी रहेको उक्त एकेडेमीमा आफ्नै सुविधा सम्पन्न भवनमा विश्वस्तरको शिक्षा प्रदान गर्ने गरि संचालन हुन लागेकोे एकेडेमीले बुधबार पोखरामा आयोजना गरेको पत्रकार भेटघाट कार्यक्रममा जानकारी गराएको हो ।
प्रत्येक विद्यार्थीको वैयक्तिक भिन्नतालाई सवलीकरण गराउनका लागि विज्ञान, प्रविधि, इन्जिनियरिङ, कला र गणित र प्रोगे्रसिप प्रणालीमा आधारित शिक्षा प्रदान गर्ने उद्देश्यले यो शैक्षिक संस्था स्थापना गरिएको प्रतिभा एजुकेशन फाउन्डेसनका अध्यक्ष नारायण पौडेलले बताउनुभयो । प्रतिभा माविको सफलतासँगै विद्यार्थीको बौद्धिक विकास र व्यक्तित्व निर्माणमा सशक्त बनाउन फाउण्डेसन अन्तर्गत रहने गरी एउटा भिन्दै शिक्षण संस्थाको रुपमा एभरग्रीन एकेडेमी स्थापना गरिएको उहाँले जनाउनुभयो । समावेशी र विद्यार्थी केन्द्रित शिक्षा प्रणालीमा विश्वास गर्दै केवल पाठ्यक्रम र परीक्षामा आधारित मात्र शिक्षा नदिई विद्यार्थीलाई जीवनका विभिन्न पक्षमा सक्षम बनाउन आफुहरुले चाहेको अध्यक्ष पौडेलले बताउनुभयो । उहाँले भन्नुभयो“हाम्रो उद्देश्य विद्यार्थीको सोच र सिर्जनात्मक क्षमता प्रकट गर्न र उहाँहरुलाई भविष्यका चूनौतीसँग सामना गर्न सक्षम बनाउनु पनि हो, हाम्रो शिक्षा पद्दति विद्यार्थीको प्राकृतिक जिज्ञासा र अन्वेषणको भावना अभिवृद्धि गर्नमा केन्द्रित रहनेछ ।” बिद्यार्थीहरुमा विश्लेषणात्मक र समस्या समाधान सीपको विकास गराउने उहाँले विश्वास व्यक्त गर्नुभयो । विद्यार्थीको आवश्यकता र क्षमता अनुसारको पाठ्यक्रम बनाएर प्रयोग गर्ने र विद्यार्थीको व्यक्तिगत आवश्यकतामा ध्यान दिई उहाँहरुको समग्र व्यक्तित्व विकासको लागि विशेष योजना पनि बनाउने योजना रहेको एकेडेमीका निर्देशक किरण सापकोटाले बताउनुभयो । शिक्षक र विद्यार्थी बीचको सहकार्यलाई पनि उत्तिकै प्राथमिकता दिने उहाँले जनाउनु भयो । अभिभावक र समुदायसँग निरन्तर संवाद र सहकार्य गरि सिकाईलाई कक्षाकोठामा मात्र सिमित नराखी जिम्मेवार नागरिक उत्पादनका लागि व्यावहारिक शिक्षामा पनि उत्तिकै जोड दिने निर्देशक सापकोटाले दाबी गर्नुभयो । विद्यालयमा हुने कार्यशाला र सामाजिक कार्यक्रमले विद्यार्थीलाई समुदायसँग जोड्ने र उहाँहरुमा जिम्मेवारीपनको पनि बोध गराउने उहाँले जनाउनुभयो ।
हाल नर्सरीदेखि कक्षा ५ सम्मको पठन पाठन गर्न सुरु गर्ने बताउदै निर्देशक सापकोटाले स्मार्ट कक्षाकोठा, विभिन्न डिजिटल उपकरण, र इन्फर्मेशन टेक्नोलोजीका माध्यमबाट सिकाइ प्रक्रिया अनुभव गर्न सक्ने जनाउनुभयो । विद्यार्थीमा टिमवर्क र सहकार्यलाई बढावा दिन परियोजनामा आधारित सिकाइको पनि प्रयोग गर्दै यस पद्धतिको माध्यमवाट विद्यार्थीहरु समस्याहरुको समाधान गर्न समूहमा काम गर्ने बुधबार विद्यालयले आयोजना गरेको पत्रकार भेटघाट कार्यक्रममा जानकारी गराएको हो । प्रत्येक कक्षामा अधिकतम २४ जनाका दरले विद्यार्र्थी भर्ना लिइने विद्यालयले जनाएको छ । भर्ना अभियान संचालन भईरहेको निर्देशक सापकोटाले बताउनु भयो ।
