नेपाल कम्युनिष्ट पार्टी (नेकपा)केपी शर्मा ओली र पुष्पकमल दाहाल–माधवकुमार नेपालले आधिकारिकताको दाबीलाई निर्वाचन आयोगले अस्वीकार गरेको छ । निर्वाचन आयोगले ओली र प्रचण्डलाई अध्यक्ष मानेको छ । दुई अध्यक्षको हस्ताक्षर विनाको निर्णयलाई आधिकारिक मान्न नसकिने जनाएको छ । दुई पार्टी एकता गरेको बेलाको कमिटी मानेको छ । दुई अध्यक्ष र महासचिवले बोलाएको बैठकले गरेको निर्णय मात्र मान्य हुने संक्रमणकालीन बिधानको ब्यवस्थालाई निर्वाचन आयोगले मानेको देखिन्छ । ओलीलाई हटाउने र माधवकुमार नेपाललाई अध्यक्ष बनाउने निर्णयलाई अस्वीकार गरेको छ ।
ओलीले थपेका केन्द्रीय सदस्य पनि अस्वीकार भएको छ । दुई अध्यक्षको हस्ताक्षर विनाका दुवैले गरेका निर्णयले बैधता पाउन नसक्ने सन्देश दिएको छ । कानुनी रुपमा नेकपा विभाजन भएको छैन । विभाजनको लागि नयाँ प्रकृया थाल्नुपर्नेछ।जुन काम कार्यकर्ता र समर्थकले रुचाउने छैनन् । कार्यकर्ता, समर्थक र शुभेच्छुकको चाहनालाई वेवास्ता गरेर गरिएको विभाजन देशको हितमा छैन भन्ने स्पष्ट भएको छ।नेताका अतृप्त चाहनाले गर्दा पार्टी विभाजन हुन पुगेको हो । निर्वाचन आयोगले विभाजनका लागि ठाउँ नदेखाएको हुँदा पार्टी एकता चाहनेले दुवै पक्षलाई दवाव दिनुपर्छ । विभाजनपछि उपाध्यक्ष वामदेव गौतम कुनै समुहमा नलागी एकता अभियानमा लाग्ने घोषणा गरेका छन् । माघ १४ गते एकता अभियान घोषणा गर्ने तयारी छ।सधैं पार्टीमा आफ्ना विचार स्पष्ट र प्रखर शैलीमा राख्ने नेताका रुपमा चिनिएका गौतम एकता अभियान चलाउन लागेका छन् । पार्टी विभाजनका बेला कित्ता स्पष्ट नगरेकाले उनलाई कतिपयले अस्पष्ट भएको भनेर पनि टिप्पणी गर्छन् । प्रधानमन्त्री केपी ओली र पुष्प कमल दाहाल प्रचण्ड–माधवकुमार नेपाल नेतृत्वको नेकपामा आउन गरेको आग्रह नेता गौतमले स्वीकार गरेका छैनन् । उपाध्यक्ष भएकोले मात्र होइन नेकपामा भएका नेता मध्ये ज्येष्ठ र संगठन निर्माणमा खटेका कारण एकता भन्ने गरेका हुन ।
प्रधानमन्त्री केपी शर्मा ओलीले अब बामदेवलाई अध्यक्ष र प्रधानमन्त्री बनाएर पार्टी विभाजन रोक्न पटकपटक प्रस्ताव पनि गरेका हुन । नेकपा बनाउन महत्त्वपूर्ण भुमिका खेलेका गौतमका आफ्नै शैलीले गर्दा बेला बखत विवादमा पनि आउने गरेका थिए।नेकपा एमाले विभाजनको आरोप खेप्नुपरेको पुरानो कुरा संझेर यसपटक विभाजनका कृयाकलापमा सहभागी भएनन । अपजसको भारी बोक्नु नपरोस् भनेर नै एकताको कुरा गरेर बसेका छन । आफ्नो धारणा सदनमा प्रष्टसंग राखेका छन । तत्कालै नेकपाका दुवै विभाजित समूह एकतामा आउने छाँट देखिन्न । उनी देशभरका कार्यकर्ता समेटेर एकताको लागि अभियान चलाउने तयारीमा छन् । उनका समर्थक ओली र प्रचण्ड–नेपाल समुहमा लागेका छन । दुवैतर्फका समर्थकलाई एकताको लागि दवाव दिन सजिलो हुने ठानेको पनि हुन सक्छ । विशेषगरी पूर्व एमालेको तल्लो तहको एउटा पंक्ति पार्टी विभाजनपछि दुवै पक्षमा खुल्न चाहिरहेको छैन । पार्टीको आधिकारिकता र सूर्य चिन्ह कता जान्छ भन्ने पनि उनीहरुले पर्खेका छन् । गौतमको नजर ती कार्यकर्तामा परेको छ ।
निर्वाचन आयोगले गरेको निर्णय गौतमले उठाएको अभियानलाई सघाएको छ ।अब सर्वोच्च अदालतको फैसला नआइन्जेल चलाउने अभियानले निराश भएर राजनीति छाड्न खोज्नेलाई रोक्ने पनि हुन सक्छ ।नेताहरूको पदीय भागबन्डा नमिलेको हुँदा विभाजन भएको प्रष्ट भएको छ। सधैं पार्टी सत्ता र राजकीय सत्तामा रहेका नेताहरूको चाहना विपरीत प्रधानमन्त्री ओली चल्न खोज्दा पार्टी विभाजन हुन पुगेकाले गौतमले भने जसरी एक हुन नसके पनि एकताको लागि दवाव पुग्नेछ ।