धनी र शक्तिशाली देशका नागरिकले कोभिड–१९ विरुद्धको खोप लागेको एक महिनापछि कोभिड १९ विरुद्धको खोप पहिलो पटक बिहीबार नेपालमा ल्याइने भएको छ । भारतले अनुदानमा दिने खोप बिहीबार बिहान ११ बजे अन्तराष्ट्रिय विमानस्थलमा एउटै उडानमार्फत् १० लाख डोज खोप झारिने भएको छ । भारतमा प्रयोगमा आएको खोप नेपाललाई दिने सहमति भएको थियो । स्वास्थ्य तथा जनसंख्या मन्त्री हृदयेश त्रिपाठी र नेपालका लागि भारतीय राजदूत विनय मोहन क्वात्राले बुधबार पत्रकार सम्मेलन गरि नेपालमा खोप आउने जानकारी गराइसकेका थिए । भारतले दिने खोप भण्डारणका लागि विमानस्थलमा मर्मत गरिएको एउटा र टेकुस्थित ८ वटा कोल्डचेन तयारी अवस्थामा राखिएको छ ।
केन्द्रीय भण्डारण केन्द्रबाट रेफ्रिजेरेटर भ्यानमार्फत् प्रदेश र विभिन्न तहमा क्रमशः वितरण गर्ने योजना रहेको खोप विभाग प्रमुख डा. झलक गौतमले जानकारी दिएका छन । भारतबाट ल्याइने खोप रेगुलर अर्थात् २ देखि ८ डिग्री सेल्सियस क्षमताका कोल्डचेनमा भण्डारण गर्न सकिन्छ । भारतले बुधबार देखि छिमेकी मुलुकलाई कोरोना भ्याक्सिन दिन थालेको छ। बुधबार भुटान र माल्दिभ्समा खोप पठाइएको छ । नेपाल र बंगलादेशमा बिहीबार खोप पठाइनेछ भने म्यानमार र सिसेल्सलाई शुक्रबार खोप दिइनेछ । भारतबाट ल्याइने खोप अग्रपंक्तिमा खटिएकाहरू र स्वास्थ्यकर्मीलाई लगाइने सरकारले पहिल्यै स्पष्ट पारेको छ । भारतले सिरम इन्स्टिच्युट अफ इन्डिया(एसआईआई) ले अक्सफोर्ड विश्वविद्यालय र बेलायती औषधि निर्माता कम्पनी एस्ट्राजेनेकासँग मिलेर विकास गरेको कोभिसिल्ड नेपाललाई अनुदानमा उपलब्ध गराएको हो । अक्सफोर्ड विश्वविद्यालय र एस्ट्राजेनेकाले संयुक्त रुपमा विकास गरेको ‘एजेडडी १२२२’ नामक खोपलाई भारतको एसआईआईले ‘कोभिसिल्ड’को नाममा उत्पादन गरेको हो ।
स्वास्थ्य मन्त्रालयका सचिव लक्ष्मण अर्यालका अनुसार पहिलो चरणमा आउने खोप कोभिड–१९ विरुद्ध अग्रपंक्तिमा कार्यरत चिकित्सक, नर्स तथा अन्य स्वास्थ्यकर्मीलगायत सुरक्षाकर्मीहरुलाई दिइने छ । अग्रपंक्तिमा कार्यरत समूहलाई खोप दिनका लागि आवश्यक पर्ने सम्पूर्ण तयारी पूरा गरिसकेको स्वास्थ्य मन्त्रालयको भनाइ छ ।
औषधि व्यवस्था विभाग (डीडीए)ले ‘कोभिसिल्ड’लाई गत शुक्रबार नै आपत्कालीन प्रयोगका लागि ससर्त अनुमति प्रदान गरिसकेको छ । भारतबाट प्राप्त हुन लागेको खोपलाई २ देखि ८ डिग्री सेल्सियस तापक्रममा ६ महिनासम्म भण्डारण गर्न सकिने स्वास्थ्य मन्त्रालयले जनाएको छ । नेपालले खोप ल्याउन आवश्यक कानुनी, प्राविधिक र आर्थिक सुनिश्चितता गरेको छ।पहिलो चरणमा जनसंख्याको तीन प्रतिशत र त्यसपछि क्रमशः ७२ प्रतिशत जनतालाई निशुल्क खोप दिने घोषणा गरिसकेको छ।खोप लगाउदा पहुँचका आधारमा होइन आवश्यकताको आधारमा हुन्छ भन्ने विश्वास दिलाउन
जरुरी छ ।