प्रधानमन्त्री केपी शर्मा ओलीले प्रतिनिधि सभाको विघटन गरेपछि सत्तारूढ नेपाल कम्युनिस्ट पार्टी (नेकपा) विभाजित छ । ओली नेतृत्वको नेकपा र पुष्प कमल दाहाल प्रचण्ड– माधवकुमार नेपाल अध्यक्ष रहेको नेकपा कुन आधिकारीक हो भन्ने विवाद निर्वाचन आयोगमा पुगेको छ । प्रतिनिधि सभा विघटन सम्बन्धी मुद्दा सर्वोच्च अदालतको संवैधानिक इजलासमा चलिरहेको छ । विघटन विरुद्धको मुद्दामा वहस गर्ने कानुन ब्यवसायिको संख्या धेरै छ । दैनिक दुई जनाले बहस गर्दा कति महिना लाग्ने हो भन्ने अवस्था छ । चुनाव हुने बेलासम्म बहस चलिरहने त होइन भनेर संवैधानिक इजलासबाट न्यायाधीशले ब्यंग्य भएको छ । विघटनको पक्ष र विपक्षमा अदालतमा बहस चलिरहेकै बेला नेकपा दुवै पक्ष अदालतलाई प्रभावित पार्ने गरि बोल्दै हिड्नु आबश्यक होइन ।
प्रतिनिधि सभा पुनःस्थापनाको माग राखेर सडक आन्दोलनमा गरिरहेका नेताहरूको अभिब्यक्ति सुन्दा देशप्रति जवाफदेही नभएको जस्तो छ । आन्दोलन शान्तिपूर्ण ‘भेजिटरिएन’ भएकोमा प्रचण्डलाई पटक्कै चित्त बुझेको छैन । उनले युवाविद्यार्थीहरूलाई ‘आक्रामक’ र ‘आवेगमय’ आन्दोलनका निम्ति उक्साउने अभिव्यक्ति आइतबार कार्यकर्ताहरूलाई सम्बोधन गर्ने क्रममा दिएका छन् । यही पुस ९ गते सत्तारूढ दलको सत्ताबाहिर रहेको समूहले काठमाडौं उपत्यका ‘अस्तव्यस्त’ बनाउने आन्दोलन कार्यक्रम घोषणा गरेको छ । आन्दोलनका नाममा अराजकता उत्पन्न गरेर मुलुकको हितमा देखिदैन । विरोधका कार्यक्रम आक्रामक र आवेगपूर्ण बनाउनु पर्ने बेला होइन । नेकपा अहिलेसम्म वैधानिकरूपमा एउटै दल हो । नेकपाका दुवै अध्यक्षले एकअर्काप्रति प्रयोग गरेका शब्दहरू नै हिंसात्मक र आवेगपूर्ण छन् । उनीहरूको कुण्ठा, द्वेष, घृणा र आक्रोश सडकमा छताछुल्ल भएका छन् । जनजीवन नै अस्तव्यस्त बनाउने धम्कीले देश बनाउने सोच भन्दा सधैं प्रतिपक्षी भएर आन्दोलन मात्रै गर्ने खालका पार्टी हुन भन्ने सन्देश जान्छ ।
प्रधानसेनापति रुक्मांगद कटवाल हटाउन खोज्दा प्रचण्डले प्रधानमन्त्रीबाट राजिनामा दिनुपरेको थियो । त्यसपछि दुई ठाउँबाट चुनाव हारेका माधवकुमार नेपाल प्रधानमन्त्री छँदा २०६७ वैशाखमा पुष्पकमल दाहालको नेतृत्वमा काठमाडौं घेर्न देशभरका कार्यकर्ता उपत्यका भित्र्याइएका थिए । काठमाडौं अस्तव्यस्त बनाए पनि घेराउ फिर्ता लिन वाध्य भएका थिए। प्रतिनिधि सभा पुनःस्थापनाको आन्दोलनमा अहिलेसम्म राजनीतिक दलका कार्यकर्ता र अभियन्तामात्र आएका छन् । अहिले काठमाडौंमा कोभिड–१९ को संक्रमण केही मत्थर देखिए पनि साम्य भएको छैन । नयाँ प्रकारको भाइरसको संक्रमण संसार भर बढ्दै छ । देशको सबैभन्दा ठूलो र संक्रमणको जोखिममा भएको सहरलाई अस्तव्यस्त बनाउन युवाविद्यार्थीलाई उक्साउनु क्षणिक आक्रोस र आवेग हो । शान्तिपूर्ण र अहिंसाबाट पनि सरकारलाई झुकाउन सकिन्छ भन्ने डाक्टर गोविन्द केसीले देखाएका छन । भेजिटेरीयन आन्दोलनले भएन र हुदैन भन्ने धङ्धङीबाट मुक्त हुनुपर्दछ ।