देशको राजधानी काठमाडौं र झापामा राजतन्त्रको बहाली र हिन्दुराज्य हुनुपर्ने भन्दै प्रदर्शन भएका छन । देशका विभिन्न शहरमा राजतन्त्र समर्थनमा भएका जुलुसले परिवर्तनका उपलब्धि जोगाउन प्रमुख राजनीतिक दलहरूले सोच्ने बेला आएको छ । राजनीतिक दलहरूको आन्तरिक विवाद चुलिएको मौकामा भएका प्रदर्शनले गणतन्त्र, संघीयता, धर्मनिरपेक्ष लाई चुनौती दिन खोजेको छ । मिश्रित निर्वाचन प्रणालीबाट बहुमत ल्याउन सफल नेपाल कम्युनिस्ट पार्टी (नेकपा) मा एक वर्ष अघिदेखि भद्दा गुटबन्दीको कारण अस्थिरता बढेको छ । चुनावमा राजनीतिक स्थिरताको नारा दिएपनि नेताहरूको अस्थिरताले राजा आउ भन्ने नारा देशब्यापी भएको छ । दिल्लीमा गएर १२ बुँदे संझौता गर्ने शक्तिहरू बीचको सम्बन्ध राम्रो हुन नसक्दा राजतन्त्र समर्थकले जनआन्दोलनका उपलब्धि उल्ट्याउने नारा लगाउने अवस्था आएको हो ।
सडकमा यति चाँडै राजतन्त्रको नारा र आन्दोलनको उपलब्धि उल्टाउनु पर्छ भन्ने स्थिति आउन दिनुमा १२ बुँदेका पक्ष जिम्मेवार हुन । अझ कोभिड–१९ को महामारीको बेला अनावश्यक भिडभाड रोक्नुपर्ने बेला भिड जम्मा गरेर कोभिड–१९ लाईब खेलवाड गरेका छन । जहा भिडभाड हुन्छ त्यहाँ कोरोना संक्रमण धेरै हुने गरेको छ । अनावश्यक भिड जम्मा गरेर संक्रमण फैलाउनुलाई गतिलो काम ठान्ने प्रबृत्ति बढ्नु बिडम्वना हो । स्वास्थ्य सुरक्षाको लागि बनाइएको मापदण्ड पालना गर्नु सरकारको आदेश पालना गरेको ठह¥याउन थालिएको छ । देशका मुख्य सहरमा राजाका पक्षमा भड्किला जुलुस प्रदर्शन गरिएका छन् । कार, जीप, बस, मोटरसाइकल ¥याली गरेर जनमत बढाउन खोजिएको छ।भड्किलो र खर्चिलो जुलुसहरूबाट राजाको निरंकुश शासनका समर्थक र हर्ताकर्ताहरू निकै उत्साहित भएको देखिन्छ ।
हिन्दु धर्म र राजतन्त्रलाई जोड्ने चलाखी राजा समर्थकहरूले गरेका छन् । जनताको घर आँगनमा आएको अधिकार संघीयताका विरुद्ध पनि अप्रत्यक्षरूपमा जनमत बनाउने प्रयत्न गरेको देखिन्छ । राजा आउ देश बचाउ जुलुसहरूका माध्यमबाट दोस्रो जनआन्दोलनका सबै उपलब्धिविरुद्ध जनमत बढेको देखाउन खोजिएको छ । लोकतान्त्रिक शासन व्यवस्थामा आफ्नो पक्षमा जनमत बनाउन शान्तिपूर्ण उपायहरू अपनाउने अधिकार हुन्छ । नेपालको संविधानले पनि यस्तो अभ्यास गर्ने स्वतन्त्रता नेपाली नागरिकलाई दिएको छ । यही कारणले सरकारले यस्ता प्रदर्शनहरू नरोकेको हुनुपर्छ । लोकतन्त्रमा संविधानले दिएको अधिकारको शान्तिपूर्ण अभ्यास गर्न रोक्नु पनि हुँदैन । कोरोना संक्रमण फैलिन नदिन भिडभाड रोक्नुपर्छ । सरकारले छुट दिएको राजनीतिक अधिकारका लागि हो । कोरोना फैलाउने कारक बन्जका लागि होइन ।
देशका प्रमुख राजनीतिक दलहरूका आन्तरिक विवाद, सत्ताको लुछाचुँडीले गर्दा जनतामा वितृष्णा बढेको छ । सत्तारूढ नेपाल कम्युनिस्ट पार्टी (नेकपा) भित्रको अराजनीतिक गतिविधिले जनतामा चर्को वितृष्णा उत्पन्न भएको छ । प्रमुख विपक्ष नेपाली कांग्रेसले पनि जनपक्षीय नारा दिएर जनता आकर्षित गर्नसक्ने नेतृत्व वा सुझबुझ देखाउन सकेन । अरू कुनै पनि राजनीतिक दलको जनस्तरमा प्रभाव पार्न सकेका छैनन् । सरकार र दलहरूका अस्थिर स्वभावका कारण जनतामा निराशा उत्पन्न गराउने प्रयत्न भएको छ । राजतन्त्रका समर्थकहरूले यही बेला राजाका पक्षमा जनमत बनाउने र शक्ति प्रदर्शन गर्ने मौका पाएका हुन । सरकारले जनतालाई सुशासनको अनुभुति दिलाउन सक्यो र दलका नेताले बेला न कुबेला कुर्सीको खेलमा नलागे मृत्यु भएको राजतन्त्र ल्याउन खोज्नेहरुलाई जनताले साथ दिने थिएनन ।