एक वर्ष अघि कोरोना संक्रमण फैलिन नदिन एकहप्ताका लागि गरिएको लकडाउन करिब चार महिना कायम रहेको थियोे । लकडाउन नगरेको भए कोरोना संक्रमण भयावह हुने रहेछ भन्ने महसुस सबैले गरेका छन । लकडाउन हटेपछि स्वास्थ्य मापदण्ड पालनामा बेवास्ता गरिएकाले संक्रमित बढे । भिडभाड बढ्ने र चाडपर्वका बेला संक्रमण ह्वात्तै बढ्यो । कोभिड–१९ विरुद्धको खोप शुरु भएपछि जनतामा पलाएको उत्साह युरोप र भारतमा कोरोना संक्रमितको संख्या बढ्न थालेपछि फेरि एक वर्ष अघिको अवस्थाको स्मरण गराएको छ । कोरोना संक्रमणको जोखिमलाई रोक्न स्वास्थ्य मन्त्रालयले भारतबाट नेपाल प्रवेश गर्ने नाकामा निगरानी बढाउनुपर्ने कोभिड संकट व्यवस्थापन केन्द्र (सीसीएमसी) लाई सुझाव दिएको छ । मन्त्रालयले विहिबार आठबुँदे निर्णयसहितको सुझाव पत्र सीसीएमसीलाई पठाएर सावधानी अपनाउने र सबैलाई सतर्क रहन संझाएको छ ।
भारत, बेलायत, जर्मनी, फ्रान्स लगायत युरोपेली मुलुकमा बढेको भाइरस संक्रमणको जोखिम नेपालमात्त समेत बढेको स्वास्थ्य मन्त्रालयले जनाइएको छ । सरकारलाई समयमै संझाउने काम जनस्वास्थ्यविद्ले गर्दै आएका हुन । विदेशबाट आउनेले संक्रमण फैलाउन सक्ने संभावना बढी रहने गरेको छ।स्वास्थ्य मन्त्रालयले त्रिभुवन अन्तर्राष्ट्रिय विमानस्थलमा आन्तरिक र अन्तर्राष्ट्रिय आगमन तथा प्रस्थान कक्षमा निगरानी बढाइ स्वास्थ्य परिक्षणमा सक्रियता बढाउन सुझाव दिएको छ । सरकार र नागरिकलाई समेत स्वास्थ्य मापदण्ड फेरि ब्यवहारमा आउने आशा गर्न सकिन्छ ।
संक्रमण बढ्ने सम्भावना भएकाले मन्त्रालयले पूर्वतयारी योजना बनाउने कुरा उल्लेख छ । सञ्चालनमा रहेका नेपाल–भारत सीमानाकालाई पुनरावलोकन गर्न र संक्रमण दर उच्च हुन पुगेका नाका घटाउनेतर्फ गृह मन्त्रालयले आवश्यक गृहकार्य गर्न पनि स्वास्थ्य मन्त्रालयले सुझाइएको छ । नाका स्वास्थ्य परीक्षणका मापदण्ड पूर्णरुपमा कार्यान्वयन गर्न लगाउने, शंकास्पद व्यक्तिको एन्टिजेन परिक्षण गर्ने, संक्रमितलाई होम आइसोलेसनमा लैजान जिल्ला संकट व्यवस्थापन केन्द्रलाई निर्देशन दिने निर्णय पनि मन्त्रालयले गरेको छ । खुला हुने वितिक्कै कोरोना संक्रमण नियन्त्रणमा आइसकेको झै गरेर गतिविधि हुने गरेको छ । स्वास्थ्य मापदण्ड पालना अरुका लागि गरिदिएको जस्तो ठान्ने गरिएको छ । त्यही प्रवृत्तिले गर्दा पर्यटन क्षेत्र अन्तर्गत सञ्चालन हुने रात्रीकालिन कार्यक्रममा स्वास्थ्य मापदण्ड अनिवार्यरुपमा पालना गर्न लगाउने, राती ९ बजेपछि रात्रीकालिन कार्यक्रम बन्द गर्न लगाउने, गर्नैपर्ने कार्यक्रममा सीमित व्यक्तिमात्र उपस्थित हुनुपर्ने निर्णय छ । अनुगमन चाहिँ पर्यटन तथा नागरिक उड्डयन मन्त्रालयले गर्नुपर्ने भनिएको छ । सबै आआफ्नो काम र क्षेत्रमा जिम्मेवार नबनेसम्म कोरोना संक्रमणको त्रास कायमै रहनेछ ।