सर्वोच्च अदालतको फैसलाले नेपाल कम्युनिस्ट पार्टी (नेकपा) को एकता खारेजसँगै सरकारको निरन्तरतामा प्रश्न खडा भएको छ।नेपाल कम्युनिस्ट पार्टी पहिल्यै दर्ता भएको हुँदा नेकपा एमाले र नेकपा माओवादी केन्द्र मिलेर नेकपा दर्ता गर्ने निर्वाचन आयोगको निर्णय बदर भएको छ । प्रतिनिधि सभामा बहुमतमा रहेको दल एकता अघिको अवस्थामा पुगेको छ।नेकपा एमाले र माओवादी केन्द्र पहिल्यैकै अवस्थामा पुग्दा सरकार गठबन्धनको हुन पुगेको छ । सरकारबाट माओवादी केन्द्रले समर्थन फिर्ता नलिए पनि कुनै पनि बेला फिर्ता लिने अवस्थामा छ।नेकपा एमाले नेतृत्वको सरकारको निरन्तरताको लागि प्रतिनिधि सभाको चौथो दल जनता समाजवादीसंग छलफल बाक्लो बनाएको छ ।
नेकपा एमालेलाई बहुमतको लागि जसपाले समर्थन गरे पुग्छ।एमालेलाई बाहिर राखेर सरकार बनाउन नेपाली काङ्ग्रेस ,माओवादी केन्द्र ,जसपा मिल्नु पर्छ । नयाँ सरकार निर्माण वा सरकारको निरन्तरताको लागि जसपा निर्णायक देखिन्छ । जनता समाजवादी पार्टीको माग सांसद रेशम चौधरीको रिहाइ, मधेस आन्दोलनका बेला लागेका मुद्दा फिर्ता र संविधान संशोधन रहेका छन । जसपाले जस्ले माग पुरा गर्ने ग्यारेन्टी दिन्छ उसैलाई समर्थन गर्ने संकेत गरेको छ।मुद्दा फिर्ता र रिहाइको लागि नयाँ बन्ने सरकारले सकेपनि संविधान संशोधन गर्न एमालेको समर्थन विना संभव छैन ।
काङ्ग्रेस र जसपाको आधार क्षेत्र एउटै भएको हुँदा काङ्ग्रेसको नेतृत्वमा जान त्यति सजिलो छैन । पछिल्लो समय केपी शर्मा ओलीको सरकारले तराईका विकासका महत्त्व दिएको छ । हुलाकी सडक, राजमार्गको स्तरोन्नति, सिचाइ, रेल, कृषिमा आधुनिकीकरण, जिल्ला सदरमुकामका सडकको सुधार, विपन्नलाई आवास जस्ता कार्यक्रम तराईमा परेका छन । केन्द्र सरकार र प्रदेश सरकारको लय मिलाउनुपर्छ भन्ने मत पनि बढ्दै गएको छ । सबैभन्दा ठूलो दललाई बाहिर राखेर मिलिजुली सरकारले स्थायित्व दिनसक्ने वातावरण बनेको छैन ।नयाँ सरकार बन्नु भनेको आलोपालो प्रधानमन्त्री बनाउने पहिल्यै असफल खेल हो । दलका मुद्दा फरकफरक बोकेर सरकार राम्ररी चलाउन सकिदैन ।
एक वर्ष पछि स्थानीय तहको निर्वाचन हुनेछ । स्थानीय तहको निर्वाचनको मुखमा सरकार फेरिएको विगतको तितो सबैले देखेका र भोगेका छन । सरकार बनाउन सहज हुने दलहरु बीचको गठबन्धन अहिलेको आवश्यकता हो । एउटैकम्युनिस्ट पार्टी बन्ने अवस्था नभए पनि बामपंथी दलको गठबन्धनको देखावटी प्रयास हुनुपर्छ । अर्को चुनावमा बामपंथी तालमेल हुनसक्ने संभावना रहेको छ।चुनावमा तालमेल हुनसक्छ भने सरकार पनि मिलाएर लैजान सकिन्छ । क्षणिक आक्रोश भए पनि अन्तिममा बामपंथी मिलेर जान सकिने विचार धेरै नेताहरूको छ । सरकार चलाउन कस्तो संयन्त्र बनाउने भन्नेमा सहमत भए सरकारलाई निरन्तरता दिन सकिन्छ । राजनीति संभावनाको खेल हो भन्ने गरिन्छ ।