प्रतिबन्धित नेपाल कम्युनिस्ट पार्टीका कार्यकर्ताले मोरङका शिक्षक राजेन्द्र श्रेष्ठको हत्या गरेका छन । मोरङको मिक्लाजुङ गाउँपालिका—७ बाट नेत्रविक्रम चन्द ‘विप्लव’ नेतृत्वको प्रतिबन्धित समूहका कार्यकर्ताले श्रेष्ठलाई घरबाटै अपहरण गरी मंगलबार हत्या गरेका थिए । विप्लव समूहले शिक्षक श्रेष्ठको हत्याको जिम्मेवारी लिएको छ । सरकारका लागि सुराकी गरेका कारण उनको हत्या गरिएको दाबी विप्लव समुहले गरेको छ । निहत्था शिक्षक श्रेष्ठको हत्या कायरतापूर्ण हो ।यो निन्दनीय कार्य हो ।
विप्लव नेतृत्वको समुहले हत्यालाई जस्तोसुकै बहाना बनाए पनि निहत्था नागरिकको हत्यालाई मानवीय विवेक भएको कसैले पनि उचित ठान्न सक्तैन । सरकार, विपक्षी नेपाली कांग्रेसले हत्याको विरोध गरेका छन।ब्यक्ति हत्याको बाटो छाडेर शान्तिपूर्ण राजनीतिमा आउन आग्रह गरेका छन । केही राजनीतिक दल र नेताहरूले कुनै प्रतिक्रिया दिएका छैनन् । यस्तो विषयमा धारणा नआउनु रहस्यमय छ। यस्ता निन्दनीय घटनालाई पनि विभिन्न वाहना बनाएर राजनीतिक रंग दिने प्रयास गरेका छन । यस्तै क्रियाकलापले गर्दा ब्यक्ति हत्या गरेर समाजलाई आतंकित गर्नेको मनोबल बढाउँछ । प्रहरी प्रशासनले समयमै स्थानीयले गरेको अनुरोधलाई बेवास्ता गर्दा अहिले स्थानीय दोहोरो मारमा परेका छन । घटनापछि संयुक्त सुरक्षा फौजले मिक्लाजुङ श्रेत्रमा चलाएको अभियानले जनसाधारणलाई सास्ती पुगेको प्रदेश सांसद र गाउँ पालिका अध्यक्षको भनाइले देखाउँछ। राजनीतिक दलका नेताहरू र सुरक्षा फौजले विगतका हिंसाबाट कुनै पाठ नसिकेको अहिलेको उनिहरुको अनुत्तरदायी प्रवृत्तिबाट स्पष्ट भएको छ । यस्ता हिंसात्मक घटनालाई ‘काल पल्टेको’ ठानेर सरकारका साथै नागरिक पनि सावधान हुनु जरुरी देखिन्छ ।
नेपालको संविधानले शान्तिपूर्ण विरोध प्रदर्शन गर्न र संगठन गर्न पाउने छुट दिएको छ।संविधानले नागरिकका हक र स्वतन्त्रताको प्रत्याभूति गरेको छ । संविधानले दिएको अधिकार प्रयोग गरेर संविधानकै विरुद्ध सडकमा नारा लगाउन पाउनु नै यसको ज्वलन्त उदाहरण हो । विप्लव समूहमाथि भने हिंसात्मक गतिविधिका कारण सरकारले प्रतिबन्ध लगाएको छ । सरकारी प्रतिबन्धले उनीहरूको क्रियााकलाप नियन्त्रण गर्न सकेको छैन । यसैले हिंसात्मक राजनीति छाड्ने सर्तमा विप्लव समूहमाथि लगाइएको प्रतिबन्ध हटाउन पनि सरकार तयार हुनुपर्छ । अपराधका लागि कसैलाई उन्मुक्ति दिनु हुँदैन ।
अपराधलाई राजनीतिक रंग दिने कारण अपराधीलाई उन्मुक्ति दिइने गरिएको छ। के राजनीति हो, के अपराध हो कहिल्यै नछुट्याउने हुँदा राजनीतिक दलको सिद्धान्त र ब्यवहार फरक देखिन्छन् । शिक्षक श्रेष्ठको हत्यालगायतका अपराधी क्रियाकलापका लागि कानुनबमोजिमको कारबाही गर्न र विप्लवका कुनै राजनीतिक माग भए तिनमा छलफल गर्न तयार रहेको सन्देश दिनु पर्दछ।सत्तारूढ दलको विवाद अन्त्य, भ्रष्टाचार, हिंसा र अराजकता हटाउन सकेमा राजनीतिक समुहको नाममा गरिने हत्या र सबै खाले आतंक रोक्न जनसमर्थन हुनेछ ।